Iaz berreskuratu zuten, Amezketan, San Joan sortako egiteko ohitura. Aurten ere zazpi landare jakinez osatutako sortak egingo dituzte, zeinak «gaitasuna duten» etxeak eta bertako bizidunak urtean zehar «gaitz eta energia ilunetatik babesteko».
Bihar arratsaldeko 16:00etatik 18:00etara, azokarekin batera, sortak nola egin azalduko dute eta herritarrek aukera izango dute aurtengoa bertan osatzeko. Horrez gain, larunbatean eta igandean ere San Martingo etxolan eskuragarri egongo dira sortak egiteko landareak.
Aurtengo kutunei edo amuletoei «leku egiteko», ordea, iazkoak desegin behar dituzte. Eta, igandean, San Joan bezperako suan egingo dute hori, joan den urteko sortak sua pizteko erabiliz edo bertan errez.