Suhiltzaileek emandako informazioaren arabera, 08:00ak aldera piztu da sua. Goizaldean Elduainen izandako auto istripura bidean zeudela jaso dute deia suhiltzaileek, eta Elduaingo gidaria onik zegoela jakitean joan dira Amezketara. Tolosa, Ordizia eta Legazpiko suhiltzaileak bertaratu dira.
Oraindik ez dakite zerk piztu duen sua, baina eraikin kanpoan piztu da, eta ondorioz, pintura kabinak ere su hartu du. Zehazki, teilapeak hartu du sua, baina ez da barrura sartu, eta horrek kalte handiagoak sortzea eragotzi du, barruan su hartu dezakeen materiala baitago. Ez da zauriturik izan.