Datorren asteko ostiralean, urriaren 6an, hasiko dira Ugarteko jaiak. Arratsaldeko 19:30ean hasiko dute festa kanpai-jotzearekin, suziriekin eta buruhandiekin. Ondoren, bertso-poteoa egingo dute Angel Peñagarikanok eta Bixente Gorostidik girotuta. Eguna amaitzeko, berriz, herri-afaria izango da, eta jarraian erromeria Jon Ostolazaren eta Rakel Pujanaren eskutik. Atsedenaldian, toka-lehiaketa ere egingo dute.
Hurrengo goizean, 11:00etan meza izango da, eta 12:00etan hasiko dira herriko gazteen pilota-partidak. Arratsaldean, berriz, denetariko jarduerak izango dituzte haurrentzat zein gazteentzat: puzgarriak eta beste hainbat jolas, zaldian ibilaldiak Ugarten zehar eta txokolate-jatea.
Mus-txapelketa ere antolatu dute: 15:30ean zabalduko da izena emateko epea, bikote bakoitzak hamar euro ordaindu beharko ditu eta partaideetako batek, gutxienez, herritarra izan beharko du. Eguna amaitzeko, 21:00etan zahagi-ardoa egingo dute, eta 22:30ean hasiko da erromeria: Ansorregi eta Larrañaga; eta Izer eta Alabier trikitilariekin.
Iganderako ere antolatu dituzte ekimenak: meza nagusiak 11:00etan hasiko du eguna eta, jarraian, txakolin-dastaketa eta pintxoak egongo dira plazan Laja bi eta Narbaiza trikitilariek girotuta. Arratsaldean, ostera, herri-kirolen erakustaldia 18:00etan hasiko da: harria jasotzen arituko dira Ainitze Zumeta eta Lierni Osa; eta aizkoran, berriz, Aratz Mugerza eta Aratz Iruretagoiena (Izeta). Ondoren, ingurutxoa egingo dute eta sagardo-dastaketa, 20:30ean. Jaiak bukatzeko Laja Bi eta Narbaiza trikitilariek girotuko dute egun amaiera.
Herri afarirako txartelak
Ostiralean herri afarian elkartuko dira auzotarrak frontoian. Herri afari horretarako txartelak dagoeneko eskuratu daitezke Goikoetxea-enean, Arkaitzpen edo Ametzan. Helduek 26 euro ordaindu beharko dute eta umeek 12 euro. Txartelak erosteko azken eguna urriaren 3a izango da.