Ekainaren 9an egin zuten irekiera-festa, eta ordutik zabalik egon da uda osoan San Martingo etxola. Hasiera batean, ostiral honetara arte -irailaren 30era arte- eduki behar zuten zabalik, baina berriki erabaki dute urriaren 28ra arte luzatzea; kudeatzaileen hitzetan, “oso gustura” daudelako bertan “sortu den giroarekin”.
Dena dela, datozen asteetan ordutegi ezberdina izango du etxolak, hain zuzen, ostiraletik igandera irekiko dute: ostiraletan 18:00etatik 23:00etara emango dute zerbitzua; eta 11:00etatik 23:00etara, berriz, larunbatetan zein igandeetan. Gainerako egunetan itxita egongo da.
Izango da beste aldaketarik ere: udan zehar ostiral eta larunbat iluntzeetan Argaia Goena baserrikoek postu bat jarri dute etxola ondoan, afariak eskainiz. Bada, asteburu hau izango da azken aukera haien hanburgesak, saltxitxak eta ogitartekoak dastatzeko.