«Ez dakigu seguru esan izan diguten bezala aranekin betekada egin, ura edan eta haren ondorioz, edo bestelako gaitzen batek erasanda hil zen Fernando. Baina gauza jakina da 1823ko uztailaren 9an itzali zela Amezketako bertsolari handia», adierazi dute herritarrek. Gaur, beraz, 200 urte bete dira haren heriotzatik.
Pernando Amezketarra, izenez Fernando Bengoetxea Altuna, 1764ko urriaren 10ean jaio zen Amezketan. Bertsolaria eta plazagizona izan zen. Bere ateraldi umoretsuengatik, bizitasunagatik eta argitasunagatik oso ezaguna izan zen Gipuzkoan, eta 1990eko hamarkadan argitaratutako marrazki bizidunen bitartez gaur egungo euskaldunen artean ere ospetsua da. Oso bertsolari eta gizon berezia izan zen. Haren bitxikeriak eta ateraldi xelebreak Gregorio Mujikak jaso zituen behin eta berriro berrargitaratu den Pernando Amezketarra izeneko liburuan.
Urteurren borobilaren ospakizuna, ordea, udazkenean egingo dute. «Fernandoren garaian ez bezala, orain, udaldian erdi-opor, erdi-lozorroan ibiltzen gara. Amezketar askok ere kanpora jotzen du egun hauetan. Hori dela eta, urteurrena udazkenean ospatuko dugu, Udazken Kulturalaren barruan».
Urteurren berezi hau ospatzeko, Amezketako Udala, Zumadi Eskola, Akelok Guraso Elkartea, Amezketako Antzerki Taldea eta Bertsozale Elkartea batu dira bi helburu nagusirekin. Alde batetik, hemendik udazkenera bitartean, Amezketako artista handiaren inguruko ospakizun egitaraua prestatzeko lan taldea osatu dute. «Eragile bakoitzetik ordezkari bana izendatu dugu eta talde honen helburua izango da eragile hauek ospakizuna elkarlanean prestatzea».
Bestalde, Amezketako gainontzeko eragileei ere gonbidapena luzatu die ospakizunean parte hartu nahi duen edozein talde edo elkartek ere bat egiteko. «Eragile bakoitzak egin ditzakeen ekarpenei tokia egitea ere izango da talde honen helburua».
Lan taldea martxan ariko da hurrengo hilabeteetan. «Bitartean saiatu Fernandoren pasadizo eta bertsoak gogoratu eta haiekin gozatzen», esan dute.