Aurtengo edizioa XXXIII.a da eta ohi bezala, hiru mailatan jokatuko da: kadete, promesak eta eliteak. Maila bakoitzean Euskal Herriko eta Errioxako hamabi pilotari onenak ari dira lehian. Partidak ostiraletan eta larunbatetan 21:30etik aurrera izango dira, Larrunarri pilotalekuan. Final aurrekoak abuztuaren 4an eta 5ean izango dira eta finalak abuztuaren 24ean izango dira, herriko jaietan, San Bartolome egunean.
Lehen bi jardunaldietan, aurreko ostiralean eta larunbatean, hiruna partida jokatu ziren. Kadetetan Segurolak aurrera egin zuen Rekalderi 17-22 irabazita, eta beste partidan Ramirez gailendu zen 8-22 Ibairen aurka. Promesa mailan, Zabaletak 20-22 irabazi zion Aranbarriri, eta Lizeagak 22-19 Iraetari. Elite mailan, Igoak egin du aurrera Irazustabarrenari 19-22 irabazita, eta Astizek ere pausoa eman du aurrera Gutierrezi 22-12 irabazi ondoren.