22-12 irabazi dio Altuna III.ak Ezkurdiari, Iruñeko Labrit pilotalekuan. 228 pilotakadako partida jokatu dute Aspeko bi aurrelariek. Finaleko txartela zegoen jokoan, eta beste behin, laugarren aldiz, nafarra aukerarik gabe utzi du amezketarrak.
Altuna III.aren laugarren finala izango da Bilbokoa. Orain arte hiru jokatu eta bi irabazi ditu. Beraz, bi aste barru hirugarren txapela irabazteko ametsa izango du buruan Tolosaldeko aurrelariak.
Labriteko partida ez da ikusgarri horietakoa izan. Sakea urdin suertatu da eta Altuna III.ak tanto bolada egiteko probestu du, Ezkurdiaren hutsen laguntzei esker. 10-2 jarri da amezketarra aurretik, eta hortik aurrera, estutasunik gabe, 22rako bidea egin du tarteak ematen zion konfiantza aprobetxatuz.
Gakoetariko bat galdutako pilotetan egon da. Amezketarrak lau pilota bakarrik galdu ditu, arbizuarrak 12. Egindakoetan antzera ibili dira, lehenak 10 eta bigarrenak 8.