Kanporaketa estuagoa espero zen, baina ez zen hala izan. Ibilbide oparoa egin dute gipuzkoarrek aurtengo ekitaldian, pilotari gazte interesgarriak kantxaratu baitituzte, baina koska bat gorago daudela nabarmen erakutsi zuten ultzamarrek.
Jaialdiko lehen partidan, kadeteen artekoan, Aldaz eta Martikorenak 22-8 menderatu zituzten Gorostidi eta Karrera. 8-6kotik aurrera, erritmoari eutsi zioten nafarrek, eta erraz nagusitu ziren.
Jaialdiko neurketarik estuena gazteen artekoa izan zen, eta Buruzgaineko Barberenak eta Garañok 22-20 irabazi zieten Zazpi Iturriko Armaolea eta Mujikari. Hamabosnako berdinketara arte gidoi berbera nagusitu zen. Irekita zegoen lehia, baina nekea agertu zitzaien gipuzkoarrei, eta, horri esker, gorriak 21-15 aurreratu ziren. Bazirudien dena erabakita zegoela, baina tanto bakar batera jarri ziren urdinak. Halere, azkenean bigarren puntua eskuratu zuen Buruzgainek.
Kontuak hala, lanak oso bideratuta zeuzkaten nafarrek azken partidarako, eta ez zen kolorerik izan. Ultzamako Iriartek eta Murillok 22-12 menderatu zituzten Gorostidi eta Plazaola.