70 urtez itxita izan eta gero, iaz ireki zuten Ierabizkar errota. Urtemuga ospatzeko festan murgildu ziren herritarrak, atzo goizean, errotan bertan, Pello Zabala gunean. Zaldizketako Edurne Barriola herritarra izan zen bertan, Kintze poneyarekin, eta poneyen komunikazioari buruzko tailerra eskaini zuen. Horren ostean, bertaratu zirenek poneya orrazteko, ukitzeko edota berarekin argazkiak ateratzeko aukera izan zuten. Agurtzane Garmendia herritarrak esan duenez, «hitzaldi interesgarria eta polita» eskaini zuen Barriolak. «Asko eskertzen dugu herrian horrelako pertsonak izatea», gehitu du.
Horrez gain, Amezketako lehen sektoreko produktuekin egindako pintxoak dastatzeko aukera izan zuten bertaratu zirenek, eta musika ere lagun izan zuten, bi herritarrek soinua eta panderoa jo baitzuten. «Urte guztian zehar jende asko ibili da Pello Zabala gunea bisitatzen, eta atzo ere hori ikusi ahal izan zen; oso pozik gaude», esan du Garmendiak.