Tokiko Energia Komunitatea sortzeko urratsak ematen ari dira Amezketan. Otsailaren 23an egin zuten lehen bilera informatzailea. Ia 40 lagun bildu zirela zehaztu du udalak. Bilera hartan, aurre inskripzioak egiteko epea zabaldu zen, eta azken hilabetean 30 bat lagunek eman dute izena.
Bien bitartean, udalak urratsak eman ditu formalki Tokiko Energia Komunitatea sortzeko, elkarte bezala eratzeko Eusko Jaurlaritzaren aurrean, alegia, lehendakaria, diruzaina eta idazkaria izendatuta.
Orain, energia komunitatean izena eman eta bazkide izateko epea zabaldu dute. Horretarako prestatuta dagoen web orrian egin beharko da, aurre inskripzioaren esteka kendu da eta berri bat txertatu dute Eman izena jartzen duena. Hor sartu eta datuak bete beharko dira, eta horrela, Tokiko Energia Komunitatearen bazkide izaera lortuko da, eta eguzki plakak martxan jartzen direnean, argindarraren fakturan deskontua izango du bazkideak.
Edozein zalantzarekin 948 987 232 telefono zenbakira deitu daiteke edota Amezketako Udalera deitu edo bertaratu.