Atzotik hasita dabiltza talaiak makilak astintzen. Atzoko eguna baserriz baserri pasa zuten, bi taldetan banatuta. Batzuk Amezketako baserrietan barrena ibili ziren eta besteak Bedaio inguruan.
Eta gaur goizean ere fin asko atera dira berriro. bi taldetan banatuta, Ugartetik abiatu dira batzuk, eta beste taldea Zubillaga auzoko baserrietan barrena ibili da. Eguerdian, Okindegi inguruan elkartu dira eta herrigunea guztiek elkarrekin alaitu dute. Tartean-tartean, tripa betetzeko eta deskantsurako geldialdiak ere egin dituzte, baina bien bitartean makilak joaz ibili dira bi ilaratan jarrita. Arratsaldean amaituko dute ibilbidea, etxe guztien atariak alaitzen dituztenean.
