Larrondoko larrealdirako izena emateko epea ireki da, eta datorren urtean ganadua Larrondora igo nahi dutenek orain izena ematea nahitaezkoa dute. Amezketako Udalak izena emateko azken eguna hilaren 30a dela adierazi du, eta udaletxeko bulegoan egin behar da izen ematea.
Behiak, ahuntzak eta ardiak 2023ko maiatzaren 1etik 2024ko martxoaren 31ra bitartean larreratu ahal izango dira. Aldiz, behorrak eta zaldiak larreratzeko epea urriaren 12an irekiko da eta martxoaren 31n bukatu. Animalia bakoitzeko ordaindu ere egin behar da, eta ardi eta ahuntz bakoitzeko euro bat, eta behi edo behor bakoitzeko 10 euro ordaindu beharko ditu ganaduzaleak.
Udaletik garbi utzi nahi izan dute, nahiz eta ganadua udazkenean larreratu, urtea bukatu baino lehen udaletxean apuntatzea behar-beharrezkoa dela. "Neurri honi jarraipen zehatza egingo diogu, eta agindu hau betetzen ez bada udalak bere neurriak hartuko ditu", esan dute. Era berean, "abereek derrigorrezko osasun baldintzak bete behar dituzte", gaineratu dute.
Gainera, ohartarazi dute Larrondora ezin dela ganadurik eraman Enirio-Aralarko larreetara igo aurretik, hau da, Enirio-Aralarko larreetara zuzenean eraman behar dela ganadua.
Bukatzeko, landatutako landare gazteak eta itxiturak errespetatzeko eskatu du Amezketako Udalak.