Aitor Elordik izan da Lau eta Erdiko Txapelketaren ezusteko nabarmenena, Jakari irabazi ondoren, Laso, Ezkurdia eta Elezkano menderatu zituelako. Baina Altunaren aurka ezin izan zuen berea eman, batez ere amezketarrak sekulako erakustaldia eman zuelako. Elordi berak nabarmendu zuen partidaren amaieran, Altunak "milimetrora" jokatu zuela, eta horrela oso zaila dela egungo Lau eta Erdiko txapeldunari irabaztea.
Partida garrantzitsuetan Altuna hazi egiten da, eta horrek erakusten du 26 urterekin kaiolako zazpigarren finala jokatuko duela jarraian. Aurreko sei finaletatik hiru irabazi ditu. Ezkurdia izango da beste finalista, eta horrek bi txapel ditu jantzita, biak Altunari irabazita. Azaroaren 20an izango da finala, Bilbon, eta amezketarra laugarrena janzten saiatuko da. Bere zazpigarrena txapela izango litzateke, buruz buru bi txapel dituelako eta binaka beste bat.