Azken urteetako dantzarik jendetsuenetako bat izan da aurtengoa; guztira, hamalau bikotek hartu dute parte ohiturazkoa den Ingurutxoa dantzan. Neska-mutil, gizon-emakumeei doinua jartzen Garikoitz Llobregat txistularia aritu da, beste behin.
Txuri-urdin uniformeari astindua eman eta bi urteko etenaren ostean berriro ere atera dira dantzariak plazara. Oraingoan gainera, dantzari berri ugari izan dira: neska-mutil gaztetxoak. Dantzari berriei aurreko asteetan Gotzone Zubillaga, Eider Amundarain eta Leire Sagastume entseguz entsegu pausoak erakusten aritu dira.
Honela, auzoaren txalo zaparrada jaso zuten 28 dantzariek, Ugarteko frontoia uzteko garaian. Segidan, trikiti hotsen laguntzaz sagardo dastaketarekin amaiera eman zieten auzoko festei.