Xabi Goikoetxea amezketarra txapeldunorde izan da Espainiako Mus Txapelketan, lau erregetako modalitatean. Joan zen ostiralean eta larunbatean jokatu zuen txapelketa, Dani Garcia azpeitiarra bikotekide zuela, Iruñeko Andia hotelean. Guztira, 69 bikotek parte hartu zuten lehian, eta gipuzkoarrak final handira iritsi ziren. Azken partidan, ordea, Burgosko Ivan eta Marcial nagusitu zitzaizkien. Horrenbestez, bigarren postuarekin konformatu behar izan zuen Goikoetxea-Garcia bikoteak.
Ostiralean, bi partida jokatu zituzten Goikoetxeak eta Garciak, eta bietan nagusitu ziren. Larunbatean, berriz, 10:30ean hasi ziren lehiatzen, eta 3:30ean amaitu zituzten egitekoak, 11 partida jokatu ondoren. Hiru neurketa galdu behar ziren txapelketatik kanpo geratzeko, eta Goikoetxea-Garcia bikoteak hamar irabazi eta bakar bat galdu zuen egun osoan zehar; hala lortu zuen finalera iristea.
Ivanek eta Marcialek osatutako bikotea bederatzi partida irabazi eta bi galduta iritsi zen finalera. Aurrez, gainera, Goikoetxeak eta Garciak neurketa bat irabazi zieten haiei, baina final handian ezin izan zieten aurre hartu gipuzkoarrek. Izan ere, Goikoetxea eta Garcia finalera partida bateko abantailarekin iritsi baziren ere, Burgosko bikotearen aurka bi neurketa jarraian galdu zituzten, eta azkenean, bigarren izan ziren sailkapenean. Horrenbestez, Espainiako Mus Txapelketan txapeldunorde izan ziren gipuzkoarrak, eta 1.235 euroko saria eskuratu zuten.