Atzo Andra Maria Zuriaren bigarren finalerdia jokatu zen Ogeta pilotalekuan. Zortzi egun jokatu gabe egon ondoren, Altuna III.ak hasiera ikaragarria eman zion partidari. Zein baino zein tanto ederragoak egin zituen amezketarrak. 6 eta 1 aurreratu ziren urdinak, baina gero zeharo aldatu zen partida. Zabaletak erraz hartu zuen mendean Beñat Rezusta, eta Ezkurdiak asko asmatu zuen errematean.
Gorrien mendekotasuna izugarria izan zen hortik aurrera, eta azkenean, finalerako pasea lortu zuten, Altuna III.a eta Rezusta mendean hartuta eta 22-13 irabazita.
Irabazleek Laso eta Imaz izango dituzte aurkari bihar jokatuko den Andre Maria Zuriaren Torneoko finalean.