Udaleku irekiak antolatuko ditu aurten ere Amezketako Udalak, eta aurrera eraman ahal izateko lehiaketa bidez aukeratuko ditu begiraleak eta koordinatzailea. Horiez gain, bi pertsonak bertan praktikak egiteko aukera izango dute.
Aukeratuko duten begirale kopurua izena ematen duten haur kopuruaren araberakoa izango dela aurreratu dute.
Hautaketa egiterakoan, besteak beste, kontuan izango dituzte: 18 urte beteta izatea, izena emateko epea bukatzen denerako; udalekuen prestaketan eta udalekuak irauten dituen egun guztietan parte hartzeko prest izatea; aisialdirako begirale edo zuzendari titulua izatea; DBHko ikasketak eginda izatea edota euskararen 2. hizkuntza-eskakizunaren edo baliokidea den tituluaren jabe izatea.
Interesatuek maiatzaren 30a izango dute eskabideak aurkezteko azken eguna, eta helbide elektroniko bidez aurkeztuta agiriak ez dituztela kontuan hartuko adierazi dute udaletik. Nola aurkeztu eta aurkeztu beharreko agirien zerrenda osoa Amezketako Udaleko amezketa.eus web orrian ikus daitezke, eta baita hautaketa prozesu guztia nola egingo dute ere.