Amezketarrak inguruarekin harreman estuan bizi izan dira betidanik, eta natur eta kultur alorreko ondare aberatsa dute. Hain justu, Ierabizkar errotako eraikina eraberritu ondoren, azken hilabeteetan udala herriko ondare natural eta kulturala bilduko duen zentroa osatzen aritu da lanean.
Iragan martxoaren 20an herriak Pello Zabalari omenaldia egin zion, eta amezketarra oroitzeko eginiko oinezko ibilaldia errotan amaitu zuten. Bada, une horretan eman zuten jakitera Pello Zabala gunea izena hartuko duela aurrerantzean.
Pello Zabala gunean bildu nahi izan dituzte Aralarko parke naturala, Arritzagako bailara glaziarra, Buruntzunzingo mina, Zazpiturri iturburua, argizaiolak, Amezketako folklorea edota Pernando Amezketarrari buruzko informazioa. Gainera, errota martxan ikusteko aukerarekin batera, Talo tailerrak, hitzaldiak, ikastaroak, bisita gidatuak edo Amezketa inguruko ibilbideei buruzko informazioa ere egongo da denen eskura. Amezketako baserritarren produktuak erosteko aukera ere eskaintzen du gune honek. Inaugurazio ekitaldira gerturatu diren herritarrek gune berria ezagutzeaz gain, bertako produktuak dastatzeko eta erosteko aukera ere izan dute, bertsolari eta musikaz lagunduta.