Amezketako Irakurle Taldearen aurtengo bigarren liburua Bertol Arrietaren Gezurra Berdaderoa izan dute, eta tertuliara joan zirenek liburuari buruzko iritzi trukaketa egiteko aukera izan zuten Bertol Arrieta idazlea bertan zela.
Ordubete pasatxoko tertulia "giro onean eta jatorrean joan da", adierazi dute irakurle taldetik, hain zuzen, "liburuaren edukiek eta idazlearen izaerak izan dute zerikusia horretan; baita, noski, sabela betetzeko aukera izateak ere". Idazleari egin zioten lehen galdera bere literaturzaletasunaren gainekoa izan zen, eta behin liburuaren gaian sartuta eta idazlearekiko harremana ona izaki, "irakurleek ez dute erreparorik izan beraiek jakin nahi zuten hori galdetzeko, zein iritzia emateko". Nola idazlea, hala irakurleak, "gustura" atera ziren tertuliatik.
Hurrengorako irakurri beharreko liburua, Juan Kruz Igerabideren Doneaneko Alaba izango dute, eta hilaren 22an elkartuko dira, asteartean, 19:00etan, Amezketako Kultur Etxean.