Azken bi urteetako etenaldiaren ostean, Amezketako Udalak, 60 urtetik gorako herritarrentzat irteera antolatu du. Koronabirus aurreko dinamikak martxan jartzea erabaki dute, eta kasu honetan, Ezkio-Itsason dagoen XVI. mendeko Igartubeiti baserrira egingo dute bisita. Lehentasuna 60 urtetik gorako herritarrek izango dute, baina autobusa betetzen ez bada, gainerako herritarrek ere joateko aukera izango dute.
Autobusa 10:00etan abiatuko da Amezketako plazatik, eta ostean Ergonetik pasako da, eta ostean, Ugarten egingo du geldialdia.
11:00etan Igartubeiti baserrian bertan XVI. mendeko dolarea duen baserrian bisita gidatua egingo dute, eta bukatzean baita hamaiketakoa ere. Ondoren, Lierniko Mujika jatetxera joango dira bazkaltzera. Eta arratsalde partean, etxera itzuli aurretik, Zerainera joango dira bisitan, eta bertan paseotxo bat emateko aukera izango dute amezketarrek.
Interesdunek izena eman beharko dute udaletxean, eta horretarako egunak hilaren 20tik 26ra bitartekoak izango dira. Pertsona bakoitzak 30 euro ordaindu beharko du.
Hori bai, izena ematen dutenek musukoa derrigorrez eraman beharko dute leku itxietan jarri ahal izateko.