Amezketako Udalak berriro ere herriko gazteei begira Gaztelekua martxan jarriko du. Ateak zabalduko ditu 12-17 urte bitarte dituztenei zuzenduta, eta Gaztelekua ezagutzera emateko ate irekiak egingo dituzte gazteei eta beren gurasoei begira. Ostegunean eta ostiralean Gaztelekua ezagutzera joatera animatu ditu Amezketako Udalak.
Ostegunean, 17:00etatik 17:30era DBH 1ekoei zuzenduta, eta 18:00etatik 18:30era, DBH2koei zuzenduta irekiko dute. Ostiralean, aldiz, 17:00etatik 17:30era, DBH 3koen txanda izango da, eta DBH4koek, 18:00etatik 18:30era bisitatu ahalko dute.
Irekiera eguna urriaren 4a, astelehena, izango da, eta hortik aurrera, astelehenetik ostiralera, 16:30etik 19:30ak arte egongo da zabalik.
Urtean zehar Gaztelekuko partaide izateko izena eman beharko da, eta horretarako hilaren 27 eta 28 dira egunak, 16:30etik 19:30era, Gaztelekuan bertan.
Aurten hezitzaile berria dutela aurreratu dute, eta Ainhoa Martinez tolosarra izango da.