Amezketan bizi den gizonezko batek bere bikotekideari eraso egin zionaren berria jaso zuen udalak joan den ostiralean. «Emakumeaz gain, adin txikiko haur batek ere kolpeak jaso zituen». Erasoa salatzeko udalaren deiari erantzunez elkarretaratze jendetsua egin dute gaur arratsaldean Amezketako plazan.
Pertsonen duintasuna, askatasuna eta integritate fisikoa urratu ezin diren eskubideak direla esan du udalak, eta beraz, erabat gaitzesgarri, bidegabe, eta onartezintzat jo ditu eskubide horien aurkako jarrerak. «Ez dute lekurik gure gizartean», esan dute elkarretaratzearen amaieran irakurritako adierazpenean.
Udalak elkartasun beroena adierazi nahi izan die erasoa jasan zuten emakumeari eta haurrari eta eskerrak eman dizkie, erasoa gertatzen ari zen unean, «gauza okerragorik gerta ez zedin», erasotzailea geldiarazi zuten amezketarrei.