Hiru urte lehiatik kanpo egon ostean, atzo dortsala berriro jartzea erabaki zuen Iker Karrera amezketarrak Trail Valle de Tena lasterketan. 77 kilometro eta 6.800 metroko desnibela zuen 8K proba lehiatu zuen; Garmo Negro (3.064 m) gailurra, Ibones Azules, Respomusoko aterpetxea, Terrabay lepoa edota Sallent de Gállego herritik igaroz. Sufrituz baino erritmo onean, azkenean, brontzea lortu zuen amezketarrak atzo parte hartu zuen 8K proban.
Trail Valle de Tena lasterketako antolatzaileek beraien Twitter kontura igotako bideo batean ikusten den moduan, jokoan adiskidetasun keinuak zein garrantzitsuak diren ere erakutsi zuen atzoko egunean Karrerak. Izan ere, lasterketaren erdian, aurkari batekin pare zindoala, hark, zorte txarragatik, zapatilak hautsi zituen. Kontrolgunera iristean ordea, Karrerak bere ordezko zapatilak antolakuntzari utzi zizkion, aurkaria bertara iristean berari emateko eskatuz.