Amezketara sartu orduko nabari da egun berezia dela; kaleak hutsik eta tabernak beteta baitaude. Bakarkako Buruz Buruko finala hasteko minutu gutxi batzuk geratzen badira ere, herrian jada badute irabazlearen izena: Jokin Altuna.
Plazako bankuan eserita dauden bi amonek parez pare dute partiduoro hutsik egiten ez duen herriaren babes mezua. Aupa Jokin. Pelotaren magoa pelotari trebea ta ona lelopean irakur daiteke aurtengoan udaletxea atontzen duen pankarta erraldoia. Amezketako kaleen barrena oihuak entzun dira dagoeneko. Hasi da partidua.
Herritarren babes eta animo mezuek nahiko indar eman diote lehen minutuetan pilotariari markaigailuan 0-6 buru jartzeko. Amezketatik Bilbora, eta Bilbotik Amezketara dagoen konexioa handia dela nabari da. Abestiak ez dira falta izan tartean, eta baten batzuk dantzatzera ere animatu dira.
Azken minutuak
Txapela nork jantziko duen dudarik ez dute Beartzana jatetxean, kanpoaldean dagoen pankartak argi uzten baitu norena izango den garaipena: «Txapela batekin ezin bi buru tapatu. Bi txapelekin buru bat bai ordea. Aupa Altuna!».
Markagailua 5-21 eta ikusle guztiak garaipena ospatzeko prest daude jada; zutik eta irribarre handi batekin. Iritsi da azken tantoa, eta horrekin batera bigarren txapela. Oihuak, besarkadak eta emozio-malkoak dira nagusi oraingoan Amezketan. Txalo zaparrada batekin eman diote amaiera partiduari, baina ez egunari.
Izan ere, ospakizun handi bat zuen zain pilotariak bere herriko plazan. Aurresku eta bertsoak, herritarren txaloak eta festa izan da nagusi.