Zabor bilketa sistema berria Amezketan

Ontzi berriak, jada erabilgarri. Amezketako Udala.

Hilabete hasieran jarri zuten martxan txartel bidez irekitzen diren edukiontzien sistema Amezketan. Azken asteetan txartelak banatzen eta herritarrekin bilerak egiten aritu da herriko udala; azaldu dutenez, "sistema berriaren funtzionamendu egokia" lortzeko helburuarekin. 

Sistema berria ezartzeak doikuntzak eskatzen ditu, eta Amezketako Udalak hainbat berrikuntza egingo dituela aurreratu du. Horien artean, Ergoene auzoan bost ontzien gune berri bat jarriko du, eta auzo horretan, zein Ugarte auzoan, mantendu egingo ditu zerrautsak jasotzeko ontziak. Zubillaga auzoan, berriz, ontzi urdina eta horia jarriko ditu eta datozen asteetan, herriko konposta egiteko guneak eraitsi eta jaso egingo ditu. 

Bada ontziak irekitzeko txartela jaso ez duen herritarrik ere. Horiei txartela helarazteaz udala bera arduratuko dela ere iragarri du. Azkenik, gertatu diren gorabehera batzuk direla eta, txartelak ezin direla zulatu nabarmendu du herriko udalak. Zulatuz gero, barruan duten txip batek funtzionatzeari uzten diola eta. 

 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!