Amezketa pilotaren herria da beste gauza askoren artean. Zazpi Iturri Pilota Klubak eragin handia izan du amezketarrak pilotara gerturatzen, eta bertatik atera dira hainbat pilotari profesional ere. Orain, ordea, klubak bizirik jarraitu dezan erreleboa aurkitu beharrean daude. Bihar, 20:00etan kultur etxeko areto nagusian egingo da bilera.
Bere historian zehar, Zazpi Iturri Pilota Klubak, «poz asko eman dizkio Amezketari», azpimarratu dute udaletik, eta gaineratu, «poz hauek, besteak beste, Xalton Zabalak urteetan zehar egin duen lanaren ondorio izan dira». Orain, Xalton Zabalak bere jarduna uztea erabaki du, eta erreleborik ezean, Zazpi Iturri klubaren desagertzea etor daitekeela gogorarazi dute.
Pilota eskolako haurren gurasoak eta Amezketako Udala harremanetan egon dira, eta garbi dute Amezketan pilota kluba edukitzen jarraitzeak garrantzia duela. Horregatik, pilota gustatzen zaien amezketarrei, eta Zazpi Iturri Pilota Klubak aurrera jarraitzea nahi duten herritar guztiei bilerarako deia egin diete. «Bertan aztertuko dugu ea nola eman diezaiokegun jarraipena klubari», argitu dute.