Erakustaldia eman ondoren, finalean izango da Altuna III.a

Jokin Altunak, 22-10 irabazi dio Unai Lasori Bilboko Bizkaia pilotalekuan jokatu den bigarren finalaurrekoa. Azaroaren 17an, Lau Eta Erdiko Txapelketako finala jokatuko du, Nafarroa Arena pilotalekuan, Joseba Ezkurdiaren aurka.

Orokorrean, partida ederra jokatu dute bi pilotariek. Bi zati izan ditu, baina bigarren zatian Altunak ez dio ezer egiten utzi Lasori. Nafarrak ikaragarri jokatu du lehen zatian. 5 eta 1 aurreratzea lortu du, eta batez ere, pilota ongi mugitzen asmatu du. Fisikoki ere, Altuna baino indartsuago kantxaratu da, eta horrela mantenduko zela zirudien, baina joko horrek ez du jarraipenik izan.

Bigarren zatian, kolore gorria izan du partidak. 5nako berdinketatik aurrera, erabateko nagusitasuna erakutsi du amezketarrak. Beste behin ere, erakustaldi bikaina emanda amaitu du partida. Joko bikainarekin ari da aurtengo txapelketan, eta ez du partidarik galdu. Tanto bakarrera hurbiltzea lortu du Lasok (7-8), baina gero zuzenean joan da 21era Altuna. 13 tanto horiek era guztietakoak izan dira. Erasoan gehiago asmatu du amezketarrak, eta tantoak pilatzen joan ahala, Laso ere partidatik ateratzea lortu du. Aurrelari nafarrak, gainera, tanto batzuk ere galdu ditu tarte horretan.

Amaieran hiru pilota galdu ditu Altunak, hirurak erasoan, eta azkenean, 22-10 irabaztea lortu du. Guztira, 266 pilotakada jo dituzte, 45 minutu iraun duen partidan. 15 tanto egin ditu amezketarrak, ia denak 16-2ko partziala lortu duenean. Bestalde, 8 pilota ere galdu ditu, nahiz eta gehienak erasoan izan diren, partida hasieran, eta neurketa jada erabakita eta hautsita zegoenean. Lasok, berriz, 2 tanto besterik ez ditu egin, eta guztira, 7 pilota galdu ditu. Ez da jendetza handia bildu Bilboko Bizkaia pilotalekuan. Guztira, 854 pilotazale izan dira gaurko partidak ikusten.

Amezketarra oso gustura zegoen partida amaieran: "Tentsio handiko partidak izaten dira txapelketakoak, baina azken aldian, oso gustura ari naiz jokatzen. Gaur ere, nahiz eta 5 eta 1 galtzen hasi, sentsazioak oso onak izaten ari ziren. Jakitun nintzen, amaierara arte dena eman behar nuela. Partida erdialdean tanto gogor batzuk izan dira, eta horiek, gainera, nire aldera erori dira". Arestian aipatu moduan, indartsu hasi da Laso, erritmo bizia jarriz. Gero, ordea, behera egin du Baikoko aurrelariak, eta Altuna gehiago jokatzen hasi da. "Abiadura handia ematen dio pilotari. Partida erdialdera agian, fisikoki hobeto nengoen bera baino, eta hortik saiatu naiz min egiten".

23 urte besterik ez, eta profesionaletako bosgarren finala jokatuko du amezketarrak, laugarrena Lau Eta Erdiko Txapelketan. Iazko final bera errepikatuko da. Ezkurdiaren aurka jokatuko du Altunak, azaroaren 17an, Iruñean. "Egunerokoari eman nahi diot garrantzia, baina egia da begiz jota dudala txapela", aitortu du amezketarrak. "Finalera iristea beti da seinale ona. Urtero sinatuko genuke elkarren aurka jokatzea, nahiz eta asko kostako zaidan, Josebak ez baitu tantorik galdutzat ematen".

Jaka-Laso, hirugarren postuaren bila

Unai Lasok bere aurkariak defentsan egin duen lana goraipatu du partida amaieran, eta finalerako pronostikoa ere azaldu du. "Ezkurdiak asko jokatzen du, baina une honetan, Jokin onena da modalitate honetan, eta aurten, bereziki, oso ondo ikusten dut". Datorren igandean, hirugarren eta laugarren postuak erabakiko dituen partida jokatuko dute bi finalerdietako galtzaileek. Erik Jaka lizartzarrak, beraz, Unai Lasoren aurka jokatuko du. Partida hori, Tolosako Beotibar pilotalekuan jokatuko da, eta arratsaldeko 17:00etan hasiko den jaialdiko bigarren neurketa izango da.

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!