Lan zerrenda luzea zuen talde bakoitzak, buruan eramateko ere, baina ederki moldatu dira, eta Amezketako plazan ez da herritar gazteenen sasoiaz gozatzea baino festa hoberik izan. Lokotx biltzean, txingan, zakua lepoan hartuta, harri jasotzen, kixkiarekin sagarrak bilduz eta korrika aritu behar izan dute, lau taldetan trebeena nor zen erakusteko.
Laranja kolorekoak izan dira azkarrenak, baina guztiei balio izan die hitzorduak, sanbartolomeak ospatzen jarraitzeko. Halaxe egingo dute, gainera, gaur iluntzean afaria izango baitute parte hartzaile guztiek elkarrekin.