Amezketako Udalak Ergoiena auzotik San Martinera doan bidean abiadura moteltzeko lau irtengune jarri ditu. Inguru horretako bizilagunen eta paseatzera doazen oinezkoen segurtasuna arriskuan ikusi du udalak, eta neurriak hartu behar izan dituzte.
Azken hilabeteetan zenbait pertsonek euren kezkak agertu dituzte udalean, abiadura moteltzeko neurriak eskatuz, eta horren ostean etorri da irtenguneak jartzeko erabakiak. Udalak, hala ere, argi utzi du nahiago lukeela "sentsibilizazioaren bidetik jotzea eta ez horrelako oztoporik jartzea", baina gaineratu du ez dela beste erremediorik egon: "Motel eta arduratsu joateko esateak kasu askotan ez du emaitzarik, zoritxarrez".
Hori horrela, udalak dei egin nahi die herritarrei abiadura handian joateko ohiturak aldatzeko eta abiadura baretzeko, gerora damua ekarriko duen ezbeharrik gerta ez dadin.
