XXX. Joxean Tolosa pilota txapelketako norgehiagokak badoaz aurrera, eta Amezketako Zazpi Iturri taldeko kideek iragarri dituzte larunbatean jokatutako hiru partiden emaitzak ere.
Kadeteetan Naldaizek irabazi zuen Ibarlozaren aurka, 18 eta 10. Gazteen mailan, berriz, Uranga erraz nagusitu zen markagailuan, Etxeberriari 18-2 irabazita. Azkenik, nagusien kategorian, Uriberen eta J. Alberdiren artekoa 18-13 amaitu zen. Partida guztiak buruz buru jokatzen ari dira, kantxa osoan, eta gizonezkoen kategorietan.