Kontserbatorioko ikasketak amaitzean ohikoa izaten da herrian kontzertua eskaintzea. Halaxe egin zuen pasa den larunbat arratsaldean, Alaitz Artola amezketarrak ere, Kultur Etxean. Gainera, duela aste batzuk Euskadiko Musikari Gazteen Lehiaketan lehen postua lortu zuen eta nabaritu da horrek guztiak herrian izan duen oihartzuna.
Txiki geratu zen aretoa: adin guztietako herritarrak, kontserbatorioko ikaskideak eta irakasleak, lagunak, familiarrak… denak ziren bertan eta denentzat kontzertua eroso entzuteko adina lekurik ez.
Ignacio Arakistain azpeitiarrak egin zuen Alaitzen aurkezpena. Iaz, Arakistain bera egon baitzen Alaitzen leku berean, eta artolatar familia han izan baitzen, azpeitiarraren kontzertuaz gozatzen. Oraingoan, azpeitiarra Amezketara etorri da eta aurkezpen lanak egin gainera.
Lau obra jo zituen Alaitz Artolak. Atsedenaren aurretik J. S. Bach-en Preludioa eta fuga nº6, BWV875 eta J. Hayden-en Sonata Hob XVI:52, No. 62 (MibM). Arakistainek hurrengo bi piezak aurkeztu ostean, F. Chopin-en Nocturne Op.27 No.2 eta A. Ginastera-ren Tres Piezas Op.6 No.3 (Criolla), bi obra horiek ere jo zituen piano-jotzaile amezketarrak.
40 minutuko kontzertua, partiturarik eta ezer gabe. Alaitzek jasotako animo eta txalo guztiak eskertu nahi izan zituen eta baita, bere musika ibilbidean laguntzaile izan dituenak ere eskertu. Kontxu Altuna Amezketako bere irakaslea batetik, Begoña Altuna Zumadi eskolako tutorea bestetik, eta azkenik baina ez azken, kontserbatorioko irakasleak: Oskar Gereñu eta Junkal Guerrero.
Bis batekin eman zion amaiera Artolak:Olatz Salvadorren Korapilatzen kantuarekin. Kultur Etxetik irtetean denek zuten irribarrea ezpainetan eta herrian duten talentu guztiaren jakitun ez direla aipatzen zuen batek baino gehiagok.