Buruntzunzin Mendi Elkarteak maiatza heltzearekin batera antolatzen du Mendi Astea eta aurtengoari itxiera herritar bati omenaldia eginez eman zaio. Izan ere, Iker Karrera mendi lasterkariak merezitako omenaldia jaso du.
Omenaldi horretan, Iker Karreraren ibilbide profesionala eta pertsona bera batzen dituen dokumentala eskaini da. Dani Sagastume izan da dokumentala egitearen arduraduna eta horretarako, besteak beste, Karreraren lorpenik handienak, bere anaiaren hitzak, Goio Larrañaga eta Javi Dominguezen esanak eta Iker Karreraren bizipenak jaso ditu.
Dokumentalaren ondoren, Zigor Iturrieta mendi lasterkari ohiak eta egungo Txoriene saioko aurkezleak gidatu du galderen txanda. Biak 2010ean ezagutu ziren eta 2018an elkarrekin utzi zuten mendi lasterketen mundua, pasa den abuztuan, PTL lasterketan. Nabari izan da bien artean laguntasun handia dagoela eta bertaratutakoek barre egiteko tartea ere izan dute. Horrez gain, Ikerren lorpenez galdetzeko, mendi lasterketen egoera nola ikusten duen jakiteko eta kirolak gizartean duen gaindimentsioaz gogoetatzeko ere baliatu dute ekitaldia.
Txapeldun batek merezi duen txapela ere oparitu diote eta ondoren, Mendi Astean parte hartu dutenek afaria egin zuten, urtero legez.