Binakako txapelketaren finalerdietako bigarren jardunaldia jokatuko da asteburuan. Lehenengo partida galdu zuten bikoteak elkarren aurka neurtuko dituzte indarrak. Pilota aukeraketa gaur eguerdian egin dute eta ez da inongo arazorik egon: "Gustatu zait materiala. Beraienak pixka bat biziagoak dira baina ez dago inongo aitzakiarik; pilota onak dira" esan du Jokin Altunak.
Partida hil ala bizikoa izango da amezketarrarentzat, baina horrelakoak jokatzen azken bi hilabeteak daramatzatela esan du Altuna III.ak: "Bigarren itzulia bi garaipenekin hasi genuen. Hortik aurrerako partida guztiak larunbatekoak bezalakoak izan dira. Hil ala bizi jokatzen ia bi hilabete goaz. Gogotsu gaude eta ea ondo ateratzen den".