Berdintasuna eta genero ikuspegia lantzeko saioa, bihar

Herritar guztiak, gizon nahiz emakume, gonbidatu dituzte saioan parte hartzera. Kultur etxeko aretoan izango da, 17:30ean.

Saioaren helburua, zehazki, Amezketan berdintasuna nola egokitzen den eta nola egokitu beharko litzatekeen hausnartzen hastea da. Bidea egiten hasi nahi dute, eta horretarako Emagin, ikerkuntza eta formakuntza feministako elkartetik, ordezkari bat bertaratuko da. Arlo honetan aditua eta aholkularia izango da, eta gaia dinamizatzeaz gain, elkarrizketa eragin eta bideratuko du.

Udaletik adierazi dutenez, «berdintasun eta genero ikuspegiaren arloan, Amezketan sumatzen da emakumeen errealitatea txikia baina askotarikoa dela». Herria txikia izanik, «heldu eta gazteen artean mentalitatea erabat desberdina da, eta beste horrenbeste gertatzen da, landa eremuko emakumeen edo herrigunekoen emakumeen artean», esan dute. «Tradizioak pisu asko du gure herrian, eta beharrezkoa da tradiziotik haratago, errealitate hauen inguruan hausnartzen hastea; beste eredu batzuk ezagutzen hastea, genero ikuspegia itsasten joatea emakumeen talde desberdinetan, gizonezkoekin harreman motak identifikatzea, eta azkenik, zubiak eraikitzea emakumeen gizatalde hauen artean, eta baita gizonezkoen artean ere», gaineratu dute.

Beharrezko ikusi dute Amezketako emakumeak eta gizonak aktibatzeko hausnarketarekin hastea. Gerora, hausnarketa horretatik sortuko diren ekimen posibleetan beste urrats batzuk eman daitezkeela azalduz: «Espazio fisiko berezia, ekimen zehatzak, ikastaroak, gizonezkoentzako tailerrak,… baina hasiera batean hitz egiten hasi beharko dira gizonak eta emakumeak, edo gizonak euren artean, edo emakumeak euren artean», argitu dute. Eta «diagnostiko bat egiteko, animazio lan bat egiteko edota hausnarketa lan bat egiteko» baliatuko dute.

Amezketako Udalak gai hauek jorratzeko aukera sustatu nahi du amezketarren artean, eta biharko saioarekin emango dio hasiera.