Aralarko ondare natural eta kulturalaren leiho izateaz haratago, hausnarketa eta gogoetarako bide ematen duen pelikula da Aralar, mundua leku den lurra. Adituen adierazpenek eta mundu oniriko bateko pasarteek, Nafarroa eta Gipuzkoaren mugan dagoen mendilerro honen balioa ezagutzera ematearekin batera, kontserbaziorako deia egiten dute.
85 minutuko iraupena du eta azken urte eta erdian grabatu dute. Musika Pello Ramirez musikari ordiziarrak sortu du dokumentalerako. Jatorrizko bertsioa euskara, gaztelera eta ingelesez dago, eta azpititulatua da.
Urriaren 18an Donostiako Principe antzokian estreinatu zenetik ibilbide aberatsa izaten ari da zinema aretoetan, 2.500 lagunek ikusi baitute dagoeneko. Gainera, Bilbao Mendi Festibal eta Alemaniako Weisbaden hiriko Natourale festibalean lehiatzeko aukeratu dute.