Hogeita hemeretzigarren txapelketak ere ez du hutsik egin. Aurten, berrikuntza gisa, emakumezkoek hartu dute parte eta arratsaldeko lehen partida egokitu zaie. 17:00etan hasita jokatu dituzte aurreikusitako lau finalak. Maite Tolosa eta Aisha Etxeberria izan dira jokatzen lehenak, amezketarrak biak. Tolosak irabazi du 18-5. Hurrengo partidua kadeteena izan da. Aingeru De la Fuentek mendean hartu du Josu Igoa aurkaria 18-6ko emaitzarekin. Jarraian, gazteen txanda izan da; Julen Alberdi zizurkildarra aritu da Antton Apezetxea goizuetarraren aurka, eta nafarrak 18-7 irabazi dio. Azken partida, nagusiek jokatu dute. Ioritz Egiguren tolosarrak 18-4ko markagailuarekin irabazi dio David Uriberi.
Sari banaketan, bere izena daraman Joxean Tolosak berak jantzi dizkie lau pilotariei txapelak.