Giro ederra izan zen Elgoibarko Udal pilotalekuan, bertako San Bartolome festen barruan jokatu zen torneoko finalean. Apustuei zegokienez, faborito argiak ziren Olaizola eta Rezusta. Hala ere, ostiralean, Irribarria eta Imazen aurka finalerdia irabazi zuten Altuna-Aretxabaleta bikoteak, ez zuen horretarako aukerarik utzi nahi izan.
Lehen tantoetan, ordea, urdinak nagusi izan ziren, eta gorriei asko kosta zitzaien partidan sartzea: 0-3 eta 3-10. Bazirudien partida erraz irabazi ahal izango zutela faboritoek, baina, amezketarra eta markinarrak ez zuten amore eman, eta partidaren erdialdera iritsita, bi tantora gerturatzea lortu zuten, lehen atsedenaldiaren aurretik: 10-12.
Rezustak, jotzaile handia dela erakutsi zuen beste behin, baina atzoko pilota astunekin, zaila izan zitzaion errebotera pilotak botatzea, nahiz eta frontoia ohikoa baino laburragoa izan. Bikote gorriak, hasieratik erakutsi zuen defentsan lan handia egin zezaketela, eta Altuna asmatzen hasi zenean, partida berdintzea lortu zuten. Halako batean, lehen aldiz jarri ziren aurretik, 16-15, eta partidaren bigarren zatia ederra izan zen.
Hortik aurrera, bi bikoteak nor baino nor aritu ziren, berdinketa ugari izan ziren markagailuan, eta bigarren atsedenaldira, aurretik iritsi ziren gorriak, 18-16. Bueltan, baina, urdinek euren bertsio onena erakutsi zuten, eta hiru tanto segidan eginda aurretik jarri ziren berriro: 18-19. Hala ere, ez zuten tanto gehiago egiterik izan. Altunak ikusgarri jokatu zuen amaieran, eta pilotari onenaren garaikurra ere jaso zuen.
Partidako datuak:
Emaitza: Altuna-Aretxabaleta 22-19 Olaizola-Rezusta.
Pilotakadak:608.
Iraupena: 60 minutu eta 38 segundo.
Egindakoak:Altuna III.ak 15 (sakez 2), Aretxabaletak 1, Olaizola II.ak 8 eta Rezustak 2.
Galdutakoak:Altunak III.ak 4, Aretxabaletak 5, Olaizolak 3 eta Rezustak 3.
Partzialak: 0-3/1-3/1-4/3-4/3-10/8-10/8-12/10-12/10-14/14-14/14-15/15-15/15-16/18-16/18-19 eta 22-19.