Atzoko Ergoneko festetako ajeari aurre egiteko denetik izan da Amezketako frontoian: babarrun txuri eta beltzak, letxugak, porruak, lekak, eskarolak, azak, fruta, tomatea, piperrak... Ikasbidairako dirua lortzeko asmotan, Aralarreko zenbait ikaslek ere jarri dute postua. Horrez gain, Luis Uranga amezketarrak egindako egurrezko lanak ikusgai izan ditu bertaratu den orok. Horiez gain, pintxoak, taloak eta sagardoa nahiz ardoa dastatzeko aukera izan da tabernan.
Aurtengoan, gainera, berrikuntza batekin etorri da azoka. Lehen aldiz, martxan jarri dute Amezketa Kantari egitasmoa. Euskal kulturaren esparruan kokatzen dute egitasmoa; hori dela eta, euskal abestiak abestuz kantu jira egin dute, 12:30-13:00 inguruan.