Ugarteko festak ere heldu dira amaierara. Ostiralean hasi eta gaur gauera bitarte luzatuko dute bertakoek jai giroa. Gaur goizean, meza nagusiaren ondoren, txakolin dastaketa eta pintxoak jateko aukera izan da. Bazkal aurretik, bertaratu direnek, Lajaren trikiti saioa entzun ahal izan dute. Eta arratsaldean heldu dira protagonistak. Alde batetik, herri kiroletan aritu direnak, bestetik, dantzariak, eta azkenik, musikariak.
Arratsaldeko 18:00ak aldera hasi dira egurra mozten Aratz Mugerza eta Jon Irazu aizkolariak. Harriak jasotzen, berriz, Jokin Eizmendi aritu da. Ondoren, auzotarren eskutik, ingurutxoa ikusteko aukera izan da. Era guztietako dantzak egin dituzte haur nahiz helduek: kalejira, zubia, fandangoa, arin-arina... Azkenik, trikitilariek ere izan dute beren doinuak plazaratzeko unea. Guzti hori frontoian egin dute, eta jendea oso gustura geratu da ikusitako erakustaldiekin. Festen amaiera ondo borobiltzeko, Lajaren doinuekin dantza egiteko aukera izango da bertan.