Emaitzei begiratuta, kadeteetan, Alberdik 18-5 irabazi dio Urangari, eta Etxeitak 18-13 Larrazabali. Gazteetan Egigurenek 18-14 irabazi dio Muruari eta Osak 18-7 Zabalari (Zazpi Iturri). Nagusietan, Etxeberria izan da nagusi 18-5 Perezen aurka eta Olaizola 18-6 Egigurenen (Zazpi Iturri) kontra.
Esperotako emaitzak lortu dira, eta ezustekoa kadeteetan gertatu da. Izan ere, Etxeitak ordezko moduan jokatu zuen Oskozen partez, eta faborito zen Larrazabali irabazi zion. Zazpi Iturriko Zabala ez da iritsi bere unerik onenean finalerdietara, eta Egigurenek bidai batetik etorri berritan jokatu zuen partida.
Norgehiagoka oso interesgarriak izango dira finalean. Aipatzekoa da nagusietan elkarren aurka ariko diren Etxeberria eta Olaizola gertutik jarraitzen dituztela enpresa profesionalek. Sari banaketan Joxean Tolosa izango da eta ziurrenik ere Jokin Altuna bertan egongo da. Sarrerak 5 euro balioko ditu, 18 urtetik gorakoentzat. Ohi moduan, ikusle ugari izatea espero da igandean Amezketako pilotalekuan.