Gorbeia eta Solluberen arteko finalerdia igandean jokatu zen, Zeanurin. Maldan gora jarri zitzaien kanporaketa Gorbeiakoei; lau t'erdian Dariok 18-14 irabazi zion Jaunarenari.
Binakakoan Altuna III-Rezustak lanak izan zituzten Irribarria-Irustari aurre egiteko, baina finalerdia berdintzea lortu zuten 22-18ko emaitzarekin. Guztia buruz burukoan erabaki zen, eta hor Julen Retegik Mendizabal III.a zapaldu egin zuen, 18-2ko emaitzarekin.
Finalean Gorbeiakoek Bakaikoa, Bengoetxea VI-Albisu eta Victor izango dituzte aurkari.