1.400 ikusle inguru bildu dira gaur Iruñeko Labrit pilotalekuan, lau t'erdiko San Fermin torneoko finala ikustera. Bero ikaragarria kanpoan, eta baita barruan ere. Bi pilotariek, partida borrokatua eta gogorra jokatu dute, intentsitate handikoa, eta beroak ere eragina izan du, batez ere bigarren zatian.
Hasieran, gauzak parekatuak joan dira, eta markagailuak ere horixe erakusten zuen. Altuna irabazten hasi bada ere, ez du lortu abantaila handitzea, eta hamarnako berdinketara arte, gauzak oso estu joan dira. Bitarte horretan ikusi ahal izan dira tantorik politenak, baita jokaldirik onenak ere. Egindako gehiago zituzten, galdutakoak baino.
Bigarren zatian, ordea, batetik Olaizolaren inspirazioak, eta bestetik beroak, min handia egin diote Amezketako pilotariari. 16-10 aurreratu da goizuetarra, eta Altuna 15-16 gerturatu bada ere, hortik aurrera ez du lortu markagailuan aurretik jartzea. Gainera, orduan, tantoak bukatzeko ideia gutxi izateaz gain, sakez bi falta egin ditu, eta horrelako opariekin, une honetan ez dago Olaizola gainditzerik.
Ondorioz, hamargarren garaipena jarraian Aimarrentzat, eta Altunari orain, binakako txapelketa irabazteko aukera geratzen zaio. Bihar izango du lehen partida, Zabaletarekin batera, Ezkurdia eta Rezustaren aurka.