Amezketako Udalak Eguberrietarako antolatzen duen jarduera eskaintza zabaldu egin dute aurten. «Ikusten genuen arrakasta handia izaten zuela aurreko urteetan Gabonetako eskaintzak», azaldu du Mikel Arteaga hezitzaileak, jarduera gehiago egiteko arrazoiari buruz. «Zabalkuntza horren ezaugarri nagusiena da bereizi egin ditugula Haur Hezkuntzakoentzat eta Lehen hezkuntzakoentzat diren jarduerak»Arteagak gaineratu duenez, «aurretik batera egiten ziren, baina ikusi genuen hain adin tarte zabala izanik zaila zela eskaintza bera berdin gozatzea hiru urteko batek edo hamaika urteko batek, eta horregatik banandu ditugu».
Eskaintzaren ekintza nagusiena puzgarriak izango dira, eta hori bi adin tartekoentzat zuzendutako izango da. Begirale moduan Gaztelekuko kideak ariko dira. Beraientzat, nerabeentzat, beste hainbat jarduera izango dira, eta horien aukeraketan beraiek parte hartu dute. «Haurrentzat diren hainbat jardueratan laguntzen aritzen dira, eta alde horretatik errekonozitu behar zaie egiten duten lana eta eskertu ere bai», esan du Arteagak.
Gabonetako egitaraua osatzerakoan erreferentzia bezala aurreko urteetan egiten dena hartzen da. «Gurasoei eskatzen zaie balorazio bat egitea, eta hori kontuan hartuta jarduerak errepikatzen dira edo beste bat jartzea pentsatzen da», esan du Arteagak, eta gaineratu: «Saiatzen gara jarduera hezitzaileak izaten. Azken finean herritar aktiboak sortzea da helburua».
EGITARAUA
ABENDUAK 24, BIHAR
09:30. Zumadi eskolako haurrak Ugartetik aterako dira Gabon kantak abesteko. 13:30. Haurrentzako bazkaria Zazpitturri elkartean. Ondoren, saskiaren zozketa.
URTARRILAK 5, OSTEGUNA
18:00. Errege magoen desfilea elizatik abiatuta. Larrunarri frontoian hartuko dituzte haurrak. Ondoren txokolate jatea.
HAUR HEZKUNTZA
Abenduak 26, astelehena
11:00. Pelikula kultur etxeko areto nagusian.
Abenduak 27, asteartea
11:00. Gabonetako eskulanak.
Abenduak 29, osteguna
16:00. Jolasak.
LEHEN HEZKUNTZA
Abenduak 27, asteartea
16:00. Jolasak.
Abenduak 28, asteazkena
11:00. Pelikula.
Abenduak 30, ostirala
11:00. Altxorraren bila.
HAUR ETA LEHEN HEZKUNTZA
Urtarrilak 2, astelehena
10:30-13:00 eta 16:00-18:30. Puzgarriak.
NERABEAK
Abenduak 23, gaur
19:00. Gaztelekuan afaria.
Abenduak 26, astelehena
15:00. Txuri-urdinera irteera.
Abenduak 29, osteguna
10:00. Karting zirkuitura irteera.
Urtarrilak 4, asteazkena
16:00. Zinemara irteera.