Altuna III.ak 2014ko ekainaren 24ean egin zuen debuta profesional mailan Asperen eskutik. Orduan hiru urterako kontratua sinatu zuen. Aurreko urtean kontratu hori luzatu egin zuen beste urtebetez, 2018ra arte, beraz. Oraingoan beste bi urtez luzatuta, 2020. urtera arte Aspeko pilotaria izango da amezketarra.
Gaur Eibarko Astelena pilotalekuan izan da Urrutikoetxearekin batera, igandeko partidarako pilotak aukeratzeko. Altunak azaldu duenez, "materiala ona da. Lau pilotak gustatzen zaizkit. Agian Urrutikoetxeak aukeratu dituenak gehiago ateratzen dira frontisetik, baina distantziarako egokiak dira". Irujoren lekua hartu du amezketarrak Lau T'erdiko Txapelketan, eta beraz ligaxkan jokatuko du. Igandekoa izango da bere lehen partida eta eta ondo dagoela esan du: "Partidaz betetako uda izan dut, eta gogoa nuen txipa aldatu eta txapelketa jokatzen hasteko. Ilusioarekin nago".