Herriko gazteen goitibehera lasterketarekin eman zaio hasiera Mozorro Egunari, eta guztiek plazan amaitu dute herriko bi taldeen arteko desafioa ikusten. Estilo guztietako mozorroak ikusi ahal izan dira.
Bazkal ordurako, udalak parrila piztu du eta pilotalekuan lau txakolin ezberdin prest zituen jarriak fresko-fresko. Plazarekin alderatuta, pilotalekuan ere "freskura" nabari zen. Baina giroa berotzen joan da kuadrillek mahaiak bete ahala. Jatekoari laguntzeko nahi adina txakolina izan dute. Jarraian, Mus Txapelketan parte hartzeko aukera izan da.
20:00etan mozorrorik onenari saria emango diote, eta 23:30etaik aurrera Obaneuke taldearekin dantzaldia izango da herriko plazan. Atsedenaldian, bingoan jokatuko dute.
Oraindik ere, amezketarrei bi egun bete-bete geratzen zaizkie festa egiteko:
Abuztuak 26, ostirala
10:30. XVI. Pilota txapelketa herrikoiaren finalak.
Ondoren. Poteoa.
14:30. Kuadrillen bazkaria, Larrunarri pilotalekuan.
Segidan. Joko poteoa.
21:00. Zahagi sagardoa (udalak sagardoa jarriko du).
Jarraian. Argazki muntaiaren erakustaldia.
23:00. Iratzar taldearekin erromeria plazan.
Atsedenaldian. Kulero eta galtzontzilo lasterketa.
Abuztuak 27, larunbata
12:30. Amaiur, Iruñeako dantza taldearen emanaldia, Larrunarri pilotalekuan.
18:00.Artzain txakurren erakustaldia, Jauregi-Haundi ondoko zelaian.
20:30. Sagardo dastaketa, plazan.
23:00. Untza taldearekin dantzaldia.
00:00. Euliaren hileta.
Segidan. Untza taldearekin goizaldera arte erromeria.
Tartean. Akelok guraso elkartekoen txekorraren zozketa.