Interesa piztu zuen partidak eta jendea izan zen Fernando Amezketarraren plazan erakustaldia ikusten. Bi taldeek serio hartu zuten norgehiagoka, eta gipuzkoarrek lortu zuten garaipena 7-2 irabaziz ordubeteko iraupena izan zuen partida. Oiartzungo Txost elkartea dabil bote luzea eta joko zuzeneko beste pilota modalitateak berpizten eta zabaltzen. Horrela, bertako kidea den Anton Mendizabal jokoaren nondik norakoak azaldu zituen partidan zehar. Amezketan ere talde bat ari da joko zuzena zabaltzen, eta, atzoko erakustaldiaz gain, martxan dagoen paxakako herri txapelketa antolatu du.
Atzoko norgehiagoka ikusten gonbidatu bereziak izan ziren Amezketan. Valentziako llargues pilota jokoko selekzioa izan zen bertan. Llargues pilota joko zuzena da ere, eta Valentzian kaleetan jokatu ohi dena. Asteburuan Valentziako eta Euskal Herriko selekzioek bi partida jokatuko dituzte, Azkoitian eta Oiartzunen, llargues-ean batean eta modalitate internazionalean bestean.