Kultura, kirola eta festa bat eginik, Amezketako kultur aste oparoan

Egitarau zabala osatu dute Amezketako Kultur Asterako. Hitzaldiak, kirola, festa giroa... askotariko gaiak bildu dituzte gaurtik hasi eta datorren azaroaren 22ra arte. Haurren elikadurari buruzko hitzaldia izango da lehen ekitaldia. «Ez da festen adineko lana guztia antolatzea, baina badira ia bi hilabete prestatzen hasi ginela taldetxo bat, elkarlanean, eta azkenean hamar egun izango dituen kultur astea lotzeak bere lana ematen du», azaldu du Iñaki Amundarain alkateak. San Martin Egunaren inguruan antolatu ohi da kultur astea, egun hori berezia baita Amezketarentzat.

Herriko kultur bizitzarentzat «oso aberasgarria» dela dio Amundarainek kultur astean egiten dena. «Beti nahi izaten dugu amezketarrak protagonista izatea, eta baita herritarrentzat pentsatutako ekitaldiak antolatzea». Hori horrela, Amagoia Etxeberria arropa diseinatzaile amezketarrak eta Iker Karrera mendi lasterkari amezketarrak hitzaldi bana eskainiko dute. Aipatzekoa da ere herriko hainbat gazte prestatzen ari diren antzezlana.

Zenbait berritasunekin dator aurtengo kultur astea. Izan ere, batetik Albitzuri-Aundi harriaren altxatze txapelketa jokatuko da. Azkenekoa 2010. urtean izan zen. Bestetik, Ergonengo festa eguna ospatuko da larunbat honetan lehenengo aldiz. Bertako gazteek mugitu dute, eta egun guztirako ekitaldiak antolatu dituzte, besteak beste, bazkaria eta gauean erromeria antolatuz.

Horrez gain, azokarik ez da egingo aurten. «Albitzuri-Aundi altxatze txapelketa kultur astean sartzearekin batera, ikusten genuen igandean egin behar zela. Azoka ere beti igandetan egiten da, eta aurreko urteetan postuak ezin lortuta ibiltzen ginen», zehaztu du Amundarainek. «Beraz, aurten atsedena egitea pentsatu dugu, bai guk, eta baita herritarrek ere, datorren urtean berriz indarberrituta egiteko asmotan».