Asegarcerekin hamalau urtez ibili da amezketarra, profesional modura. Bilboko enpresak, ordea, ez zion kontratua luzatu Saralegiri. Hasiera batean, agur partidarik ez zuela jokatuko zirudien, baina azkenean, lehia hori igande honetan izango da, bere herritarren aurrean eta pilotan hasi zen pilotalekuan.
Baina ez da hori izango amezketarrengandik jasoko duen omenaldi bakarra. Martxoaren 21ean, larunbata, herri bazkaria egingo dute Ekaitz Saralegi pilotariari eskerrak emateko. Urte guzti hauetan herritarrak inguruan izan ditu pilotariak, eta agurra esateko garaian, hauek omenaldia egin nahi izan diote.
Lehen hitzordua, beraz, kantxan bertan izango da, eta bigarrena, 20 egun beranduago, mahaiaren bueltan.