Iragan asteburuan jokatzekoa zen finalerdia atzo amaitu zen. Lehen partidan Bortziriako pilotaria nagusitu zen, elkarteari puntu bat emanaz. Partida horren ondoren, kanporaketa bertan behera geratu zen, igandean, pilotalekuaren hezetasuna medio. Atzo jokatu ziren falta ziren bi partidak.
Buruz-burukoan, Santxok egurra eman zion Olaizolari, 18-4 irabaziz. Modu guztietako tantoak egin zituen usurbildarrak, sakez, bi paretez, dejadaz... Hasieran ordea, Olaizolak itsura bikaina erakutsi zuen. Lesakarra kantxan ongi kokatu zen, eta launako berdinketa ere lortu zuen. Ondoren, ordea, hutsak egiten hasi eta partida maldan gora jarri zitzaion. Erakustaldia, Santxok eman zuen, zaletuen gozamenerako. Garaipenarekin Usurbili puntu bat eman zion, berdinketa jarriaz markagailuan.
Hirugarren eta partida erabakigarria binaka jokatu zen. Mitxelena-Martinez Bortziriak ordezkatuz, eta Gorrotxategi-Elola Usurbilen elastikoarekin. 9-22 irabazi zuten azken hauek, euren elkarteari finalerako txartela emanaz. Beteranoak nagusitu ziren, beraz. Eta aipatzekoa da Gorrotxategik atzelaria izan arren aurrean jokatu zuela. Azken aldian dena irabaziz dabil usurbildarra, eta aurrelari bezala jokatuta ere, pilotari handi bat dela erakutsi zuen.
Finala hilaren 18an jokatuko da Amezketako Larrunarri pilotalekuan, 17:00etatik aurrera. Kantxan: Galdakao eta Usurbil, nor baino nor.