2014ko irakurketa saioei erremate gozoa
Halaxe izan da. Eta eguraldi onak lagundu digunez, San Martingo paraje ederrean gauzatu dugu gaurko saioa. Ohikoa den bezala ez da gure mahaian janaririk eta edaririk falta izan, pentsa edari aparduna eta guzti. Ezta umore onik ere.
Hala ere, gaurko saioa janari eta edariak baino gehiago gozatu dute gurekin izan diren idazleek: Garbiñe Ubeda tolosarra Hobe ixilik liburuaren egilea eta Ana Jaka andoaindarra Ez zen diruagatik idatzitakoa. Garbi dago azkenaldian emakume idazleen presentzia indartsua dela literaturgintzan, eta horrek bere ikurra ematen die euren lanei. Garbiñerena istorio polita, hurbileko zenbaiten errealitatera inguratzen dena, eta Anarena pertsonaia berezi eta indartsuez osatutako istorio irakurterraza. Bata zein bestea ekintza bakan batzuen ildotik sortzen diren gogoeta indartsuez hornitua.
Eta udako Xabier Mendigurenek hauexek jarri dizkigu bakoitzak bere gustuen arabera hautagai eta gozagai: Ana Magalonen Lasai, ez da ezer gertatzen; Danele Sarriugarteren Erraiak; Lander Garroren Gerra txikia eta Juan Kruz Igarabideren Zangotraba.
Amezketako irakurle taldea